攝影人電腦節有咩值得留意?

一年一度電腦節又嚟,雖然近年已經唔係咁多人會年年upgrade部電腦,搞到電腦節都變晒質,但其實對於咁啱有需要嘅朋友,都算係一個可以一次過睇晒所有想要產品同比較價錢嘅好機會。今次筆者就幫大家行咗一轉,睇睇有咩啱我哋呢班影相友用。

印相Printer好抵買
筆者成日都話影完相要output成一張一張咁拎上手睇先過癮。原來今年Epson喺攤位特別搞咗個小型相展,推廣菲林拍攝,以掃瞄器輸入再打印成大相,大家可以去睇睇效果。另外場中買兩大牌子相片打印機亦算幾抵,睇完有興趣可以買埋返屋企。


買個NAS儲存大量相片影片

影得相多甚至拍好多片嘅朋友,都一定會為點Backup而感到煩惱。電腦節入面除咗有唔少外置Harddisk畀大家平入,仲有唔少NAS嘅選擇。所謂NAS其實就係一部畀你駁上internet而又可以遠端存取嘅裝置,部份備有備份功能,咁你去旅行影完相返到酒店就可以透過Internet直接將啲相同片放到你屋企部NAS嘅Harddisk入面,一個大吉利是壞卡或者畀人偷機,都唔會話成個旅桯啲相冇晒啦。會場入面有齊主要品牌嘅NAS畀大家即場格價,部份甚至內置SD卡糟等你影完相返屋企直接過相Backup,實用性都幾高,筆者絕對建議大家去了解一下。


記憶卡有需要咪買囉
近日記憶卡價格都好一般,個別甚至有上升蹟像,冇乜要的話真係唔需要買住。不過如果你仲用緊8GB、16GB,筆者都建議你不如整返張32GB甚至64GB快卡。


平平地試玩360或者航拍
會場入面仲有零零星星同相機有關嘅器材賣,例如360相機、Action Cam同航拍機等,主要都以平價為賣點,如果大家想「小試牛刀」咁玩一玩,都可以睇睇考慮一下。

廣告

發表迴響

%d 位部落客按了讚: